Kembang Teleng werna ungu

Kembang ungu sumebar ing telenging ati
Werna ungu semu biru endah sinawang
Pralambang manah kingkin ginubel kapang
Siyang ratri tansah gumlibet lir wewayangan
Datan bisa kaslimur tansah ngreridhu

Kembang ungu mekar mekrok ing telenging ati
Netra bening blalak-blalak lir toya wening
Pasuryan endah sumorot lir cahyaning rembulan
Solahbawa rancak tumata sugih ing tata trapsila
Anjalari keprana trenyuh sengsem ing telenging ndriya

Kembang ungu.., sapa jenengmu ?
Sayekti datan sranti tengga tibaning wanci
Lumaris ing janji temya impen-impening ati
Ing pengangen- angenku...,
sliramu dak kanthi manjing ing taman sidomukti
Ing kono.., kababar wutahing rasa brangti

Kembang ungu apa kang dadi wangsulanmu ?


(Dubin, 10Des17 / Sumuk ora sida udan)

Liwung

Wewangun swasana purwakaning ratri

Ing antawis tabuh wolu dalu

Kapiyarsi titir kenthong dara muluk

Mratandhani warta tata raharja titi tentrem

Katingal remeng-remeng mendhung ing sisih kidul kilen

nggembuleng ireng lelimengan ing awiyat

Prasasat kaya-kaya nedya ngemuli bumi

Pratandha toya caraca badhe tedhun prapti

Kadyadene rasa pangrasa kawula

Ginubel rasa liwung ndedet lelimengan

Lir benang lawe mbundet buntet

Ical dalan keblasuk margi wangsul

Kinunjara pitakon datan pinanggih ing wangsulan

Wonten pundhi papan dunung susuhing angin ?

Saking pundhi asal dumuginipun geni ?

(Dubin,27 Nov 17 # Arep udan)